राम्रो अनलाइन
२२ असार २०८२, आइतबार
लमजुङ– यहाँ एक वर्षको अवधिमा दुई लाख २२ हजार बढी पशुमा पूर्ण खोप लगाइएको छ । भेटेरिनरी अस्पताल तथा पशुसेवा विज्ञ केन्द्रका अनुसार यस आर्थिक वर्ष २०८१/८२ मा जिल्लाका आठ पालिकामा दुई लाख २२ हजार ८६९ पशुलाई पूर्ण खोप लगाएको हो ।
केन्द्रका निमित्त प्रमुख डा सुनील न्यौपानेका अनुसार विभिन्न रोगको नियन्त्रण गर्न जिल्लाका सबै पालिकाका किसानको घरघरमा पुगेर गाई, भैँसी, बाख्रा, बङ्गुर र कुकुरलाई खोप लगाइएको थियो । केन्द्रका अनुसार भैँसी ४८ हजार २७०, गाईबस्तु २६ हजार २५५, बाख्रा एक लाख २४ हजार २२५, भेडा १८ हजार ६२०, कुकुर चार हजार ५२२ र बङ्गुर ९७७ मा खोप लगाइएको थियो ।
जिल्लाका ७५ वडाका १६ हजार ५४१ किसानको यतिका सङ्ख्यामा खोप लगाइएको केन्द्रका निमित्त प्रमुख डा न्यौपानेको भनाइ छ । केन्द्रका अनुसार सबै बढी बेँसीसहर नगरपालिका र सबैभन्दा कम दूधपोखरी गाउँपालिकाका किसानका पशुचौपायमा पूर्ण खोप लगाइएको छ ।
पशुमा पूर्ण खोप कार्यक्रम सञ्चालनका लागि ८१ खोपकर्ता परिचालन गरिएको थियो । जिल्लामा सबैभन्दा बढी गाईको सङ्ख्यामा वृद्धि हुँदै गएको उक्त केन्द्रले जनाएको छ । पाँच वटा खोपले छ वटा मुख्य सङ्क्रमण रोग नियन्त्रण गर्ने र सो खोपले एक वर्षसम्ममात्र काम गर्ने र प्रत्येक वर्ष खोप लगाउने अभियान जारी रहने बताइएको छ ।
