राम्रो अनलाइन
२८ असार २०८१, शुक्रबार
काठमाडौं– वानिन्दु हसरंगाले श्रीलंकन ट्वान्टी–२० टोलीको कप्तानबाट राजीनामा दिएका छन्। हसरंगाको कप्तानीमा श्रीलंकाले भर्खरै सम्पन्न आइसिसी ट्वान्टी–२० विश्वकपमा खराब प्रदर्शन गरेको थियो । प्रतियोगितामा टोलीले समूह चरण पनि पार गर्न सकेन ।
श्रीलंका क्रिकेट बोर्डका अनुसार हसरंगाले राजीनामा पत्रमा भनेका छन्, ‘एक खेलाडीको हैसियतले श्रीलंकाका लागि म सधैं उत्कृष्ट प्रदर्शन गर्ने प्रयास गर्नेछु ।’ भारतसँगको शृंखलाअघि हसरंगाबाट यस्तो निर्णय आएको हो । यसै महिनाको अन्त्यमा भारत समान तीन ट्वान्टी–२० र एकदिवसीय शृंखलाका लागि श्रीलंका जाँदैछ ।
ट्वान्टी–२० शृंखला जुलाई २६ देखि २९ र एकदिवसीय शृंखला अगस्ट १ देखि ७ सम्म हुनेछ । हसरंगाको कप्तानीमा श्रीलंकाले जम्मा १० ट्वान्टी–२० अन्तर्राष्ट्रिय खेल खेल्यो । जसमा टोलीले ६ जित निकालेको थियो ।
